Elvisa Bela, 27-vjeçare nga komuna e Kaçanikut, ka ndjekur rrugën e arsimit me përkushtim dhe vizion. Ajo ka përfunduar studimet themelore në Fakultetin e Edukimit në Universitetin e Prishtinës, në programin e Arsimit Fillor, dhe më pas ka vijuar me studimet master në drejtimin Udhëheqja në Arsim, ku mori titullin Master i Shkencave të Edukimit.

Qysh gjatë studimeve, Elvisa ka qenë aktive në praktikën mësimore dhe në punën vullnetare me nxënës të ciklit fillor në Prishtinë, ndërkohë që ka ndjekur trajnime të ndryshme profesionale që i kanë forcuar njohuritë dhe aftësitë në mësimdhënie. Prej vitit 2022 është mësimdhënëse e rregullt në ShFMU “Idriz Seferi” në Kaçanik, ku njihet për përkushtimin, bashkëpunimin dhe qasjen gjithëpërfshirëse ndaj mësimdhënies.

Ajo është e pasionuar pas metodave inovative të mësimdhënies, përfshirë mësimin përmes lojës, përdorimin e teknologjisë në klasë, dhe angazhimin e komunitetit për përmirësimin e cilësisë së arsimit. Elvisën e udhëheq bindja se çdo fëmijë meriton mundësi të barabarta për të mësuar dhe për t’u zhvilluar, dhe se ndryshimi i qëndrueshëm në arsim fillon nga një mësues që beson thellësisht në potencialin e nxënësit.

Pjesëmarrja në Teach For Kosova është për të një hap drejt zgjerimit të ndikimit të saj në arsim dhe krijimit të një të ardhmeje më të drejtë dhe gjithëpërfshirëse për të gjithë nxënësit në Kosovë.