Blinerë Beqiri Xhafolli, 26 vjeçe, vjen nga qyteti i Vushtrrisë, ka përfunduar studimet bachelor në Universitetin e Mitrovicës “Isa Boletini”, në programin Edukimi Fillor, në Fakultetin e Edukimit. Aktualisht, është në përfundim të studimeve master në Universitetin e Prishtinës “Hasan Prishtina”, në programin Këshillim Pedagogjik.
Karrierën e saj si mësuese e nisi në tetor të vitit 2021, duke punuar për një vit shkollor në një shkollë publike në Komunën e Prishtinës. Që nga viti 2022, vazhdon të ushtrojë mësimdhënie në një shkollë private.
E motivuar dhe e përkushtuar për përmirësimin e cilësisë së arsimit në Kosovë, Blinera përdor metoda inovative dhe qasje kreative në mësimdhënie, duke u përqendruar te nevojat dhe potencialin e çdo nxënësi. Ajo synon të krijojë një ambient ku fëmijët ndihen të sigurt, të respektuar dhe të motivuar për të arritur potencialin e tyre më të lartë. Për të, edukimi nuk ka të bëjë vetëm me njohuritë akademike, por edhe me ndërtimin e vetëbesimit dhe zhvillimin e të menduarit kritik te nxënësit.
Blinera i është bashkuar Programit të Fellowship-it të Teach For Kosova, duke besuar se çdo fëmijë meriton qasjen e barabartë në arsim cilësor, pavarësisht prejardhjes apo etnisë. Përvoja e saj si mësuese e ka bërë të kuptojë fuqinë transformuese të edukimit dhe ndikimin që ai ka në krijimin e mundësive për një të ardhme më të ndritur.
Sipas saj, çdo fëmijë ka talent dhe potencial unik, dhe roli i arsimit është t’i ndihmojë ata ta zbulojnë dhe ta zhvillojnë atë. Ajo e përqafon filozofinë e Margaret Mead, e cila thotë: “Fëmijët duhet të mësohen si të mendojnë, jo çfarë të mendojnë.”
Duke i inkurajuar të eksplorojnë, të bëjnë pyetje dhe të zbulojnë pasionet e tyre, ajo synon t’i ndihmojë të bëhen individë të pavarur, krijues dhe të suksesshëm në të ardhmen.
