Dea Cermjani vjen nga Gjakova dhe është 23 vjeçe. Studimet bachelor i ka përfunduar në Universitetin e Prishtinës “Hasan Prishtina”, në drejtimin Biologji, ndërsa aktualisht është duke vijuar studimet master në programin Mësimdhënie Lëndore me specializim në Biologji.
Gjatë rrugëtimit të saj akademik, Dea është dalluar për rezultate të larta, duke u nderuar me çmimin “Hasan Prishtina” për ekselencë akademike. Ajo ka marrë pjesë në konferenca shkencore dhe programe ndërkombëtare, si Prishtina International Summer University (PISU), ku ka thelluar njohuritë në biologji dhe kërkim shkencor. Përvoja e saj përfshin gjithashtu punë praktike në laborator mikrobiologjik, ku ka zhvilluar aftësi analitike dhe bashkëpunuese.
Përvoja e saj në arsim përfshin praktika pedagogjike në shkolla të Prishtinës, ku ka zhvilluar aftësi në menaxhimin e klasës, planifikimin e orëve mësimore dhe përdorimin e metodave bashkëkohore të mësimdhënies. Përveç kësaj, ajo ka qenë pjesë e trajnimeve profesionale dhe programeve edukative që synojnë zhvillimin e mësimdhënësve dhe përmirësimin e praktikave në klasë.
Përtej angazhimit akademik, Dea ka qenë aktive në iniciativa rinore dhe projekte të ndryshme të fokusuara në mjedis, aktivizëm dhe zhvillim të komunitetit. Këto përvoja kanë ndikuar në formimin e saj si një individ i përgjegjshëm dhe i përkushtuar për të kontribuar në shoqëri përmes arsimit.
Motivimi i saj për t’u bërë pjesë e programit të Fellowship-it në “Teach for Kosova” buron nga dëshira për të ndihmuar nxënësit/et të zhvillojnë potencialin e tyre të plotë dhe për të kontribuar në krijimin e një mjedisi mësimor ku nxënësit/et ndihen të fuqizuar/a për të mësuar, për të shprehur idetë e tyre dhe për të zhvilluar mendimin kritik. Dea beson se çdo nxënës/e ka potencial për të arritur sukses kur mbështetet dhe udhëhiqet në mënyrën e duhur.
Sipas Deas, roli i mësimdhënësit/es është të krijojë mundësi që nxënësit/et të mendojnë në mënyrë të pavarur dhe të ndërtojnë rrugën e tyre drejt së ardhmes.
“Arsimi nuk ndryshon vetëm atë që dimë, por mënyrën si mendojmë dhe veprojmë për të ardhmen.”
